y broses

Dyma’r cam pwysicaf y byddwch chi’n ei gymryd, ond dyma’r cam hawsaf hefyd. Mae’n dechrau gyda’ch ymholiad cychwynnol. Cyn gynted ag y byddwch chi’n codi’r ffôn, yn llenwi’r ffurflen gyswllt isod neu’n anfon e-bost aton ni, bydd eich taith faethu yn cychwyn. Dydy hyn ddim teimlo fel cam mawr efallai, ond credwch chi ni, dyma’r cam pwysicaf y byddwch chi’n ei gymryd.

Ar ôl i chi gysylltu â ni, byddwn ni’n dechrau’r broses o ddod i’ch adnabod chi. Bydd hyn yn dechrau gyda rhywfaint o waith papur ac os gallwn ni, byddwn ni yn dod i ymweld â chi yn eich cartref. Os nad yw hyn yn bosibl, byddwn yn dechrau gyda galwad fideo anffurfiol.

Yn ystod y camau cynnar hyn, mae’n bwysig ein bod ni’n meithrin perthynas â chi. Mae hyn er mwyn i ni allu dod i ddeall beth sydd bwysicaf i chi, a dysgu mwy am y lle rydych chi’n ei alw’n gartref.

Yn gynnar iawn yn eich taith faethu, byddwch chi’n cael cynnig hyfforddiant a chyfleoedd datblygu i chi gael dysgu mwy am faethu, fel eich bod chi’n gallu bod yn sicr mai dyma’r llwybr iawn i chi. Ar y cam hwn, byddwch chi hefyd yn cael cwrdd â gofalwyr maeth newydd eraill ar yr un cam o’u taith.

Teitl y cwrs hyfforddi cyntaf hwn yw “Paratoi i faethu” ond mae hefyd yn cael ei alw’n “sgiliau maethu”. Bydd y cwrs hwn yn digwydd dros ychydig ddyddiau neu gyda’r nos. Mae’n ymwneud â datblygu’r wybodaeth, y cysylltiadau a’r rhwydweithiau gwerthfawr y bydd eu hangen arnoch chi yn ystod eich taith faethu.

Byddwch chi’n dysgu popeth am beth fydd maethu yn ei olygu i chi yn ystod eich asesiad. Ond dim prawf yw hwn. Mae’n gyfle i ni gael gwybod sut mae eich uned deuluol yn gweithio. Mae hefyd yn gyfle gwych i chi ofyn unrhyw gwestiynau sydd gennych chi. Gallwch chi siarad am unrhyw beth a allai fod ar eich meddwl.

Mae’r asesiad, sy’n cael ei gynnal gan weithiwr cymdeithasol medrus, yn ystyried cryfderau a gwendidau posibl eich uned deuluol.

Mae’n gyfle i chi baratoi ar gyfer y manteision a’r heriau sy’n dod yn sgil maethu.

Mae gan bob tîm Maethu Cymru banel. Dyma lle bydd eich asesiad yn cael ei ystyried. Mae’r panel yn cynnwys amryw o aelodau gan gynnwys gweithwyr cymdeithasol ac unigolion annibynnol. Mae pob un yn wybodus ac yn brofiadol iawn, ac maen nhw’n edrych ar bob darpar ofalwr maeth fel unigolyn.

Mae’r panel yno i sicrhau bod eich asesiad yn cael ei ystyried o nifer o wahanol safbwyntiau. Bydd aelodau’r panel yn gwneud argymhelliad yn seiliedig ar yr wybodaeth yn eich asesiad a byddwch chi’n rhan o’r broses hon.

Unwaith y bydd eich asesiad wedi bod ger bron y panel maethu, byddwch chi’n derbyn y cytundeb gofal maeth. Mae hwn yn nodi popeth mae’n ei olygu i fod yn ofalwr maeth, yn amrywio o’ch cyfrifoldebau dyddiol i’r cymorth a’r arweiniad y byddwch chi’n eu cynnig yn gyffredinol. Mae’r cytundeb hwn hefyd yn nodi’r arbenigedd a’r gwasanaethau y byddwn ni’n eu cynnig i chi fel eich rhwydwaith cefnogi ymroddedig.