Mae maethu rhieni a phlant yn fath unigryw o ofal maeth, sy’n rhoi cymorth i’r rhiant/rhieni a’u baban yn ystod cyfnod hollbwysig. Mae’n cynnig amgylchedd teuluol lle gall rhieni feithrin eu hyder a’u sgiliau magu plant, gan sicrhau eu bod yn cael y cyfle gorau i lwyddo. Er mwyn deall heriau a manteision y math hwn o faethu’n well, buom yn siarad â Jo, gofalwr maeth sydd â blynyddoedd o brofiad.
Beth wnaeth eich ysbrydoli i ddewis y math penodol hwn o faethu dros eraill?
“Rydym wedi gwneud ystod eang o leoliadau maeth gwahanol dros y blynyddoedd diwethaf; ond roedd lleoliadau rhieni a phlant bob amser yn rhywbeth yr oeddem yn gwybod yr hoffem roi cynnig arnynt. Mae’r cyfle i roi cymorth i rieni mewn amgylchedd teuluol, yn enwedig y rhai sydd â diffyg rhwydweithiau cymorth, yn rhywbeth yr oeddem yn teimlo y gallem ei gynnig. Rydym yn teimlo ei bod yn bwysig bod rhieni’n cael pob cyfle i lwyddo yn eu hasesiad rhianta tra’u bod gyda’u babi.”
A allwch chi rannu profiad a oedd yn arbennig o werth chweil rydych chi wedi’i gael yn y rôl hon?
“Roedd ein lleoliad cyntaf gyda rhiant a phlentyn yn unigryw. Cysylltwyd â ni a gofyn a fydden ni’n gallu darparu ar gyfer babi, mam y babi, a mam-gu’r babi. Roedd hyn er mwyn archwilio’r holl opsiynau gofal ar gyfer y babi wrth fyw gyda’i gilydd a gofalu am y babi mewn amgylchedd diogel a chefnogol. Roedd y lleoliad hwn yn arbennig o werth chweil i ni, ac rydym yn falch o’r canlyniad cadarnhaol. Mae’r babi, y fam a’r fam-gu bellach yn byw gyda’i gilydd ac mae’r fam a’r fam-gu yn magu’r babi.”
Bu Jo hefyd yn sôn am y gwaith paratoi sydd ei angen i faethu rhiant a phlentyn, gan dynnu sylw at bwysigrwydd deall anghenion unigryw’r rhiant a’r plentyn.
“Fe aethon ni ar gwrs hyfforddi rhieni a phlant ar-lein, wnaeth ein helpu ni i ddeall mwy am y math yma o faethu. Cawsom hefyd fodiwlau hyfforddi i’w darllen. Hefyd, roedd gan ein gweithiwr cymdeithasol cynorthwyol lawer o wybodaeth am faethu rhieni a phlant ac roedd ar gael i gynnig cyngor neu ateb unrhyw gwestiynau oedd gennym.”
Mae Jo yn cynnig y cyngor hwn i deuluoedd sy’n ystyried dechrau’r daith hon:
“Un peth rydyn ni wedi’i ddysgu, rhywbeth rydyn ni’n teimlo sy’n bwysig i’w gofio, yw bod gan bob rhiant ei brofiadau bywyd unigol, a allai chwarae rhan yn y ffordd maen nhw’n magu ei fabi, yn ogystal â sut mae’n ymateb i’ch cefnogaeth. Rhaid i chi fod â meddwl agored ac addasu eich dull yn ôl yr angen. Rydym yn teimlo y gallwch chi feithrin gwell perthynas gyda’r rhieni drwy wneud hyn ac, yn ei dro, ddarparu gwell cefnogaeth iddyn nhw.”
O ran helpu rhieni i fagu hyder a sgiliau magu plant, dywed Jo:
“Rydyn ni’n addasu ein dull i weddu i bob rhiant. Rydym wedi cael ystod eang o leoliadau rhieni a babanod, ac mae sgiliau a hyder pob rhiant unigol wedi amrywio. Rydym yn teimlo mai’r lle allweddol i ddechrau yw sicrhau bod y rhieni’n ymwybodol o’n natur anfeirniadol a gofalgar a’n bod yn cynnig lle diogel i rieni siarad â ni. Ar ben hynny, rydym yn sicrhau ein bod yn canmol rhieni am eu cynnydd ac yn eu hannog i fyfyrio ar ba mor dda y maent yn ei wneud i helpu i fagu eu hyder. Rydym hefyd yn eirioli dros y rhieni, a all amrywio o’u helpu i ystyried mynd i ddosbarthiadau magu plant i’w cefnogi os oes angen iddynt fynychu cyfarfodydd neu apwyntiadau pwysig.”
Mae un o’r straeon llwyddiant mwyaf cofiadwy i Jo yn cynnwys rhiant tro cyntaf a oedd wedi’i magu mewn gofal maeth ei hun:
“Un rhiant penodol a darodd nodyn i ni oedd rhiant tro cyntaf a oedd wedi’i magu yn y system gofal maeth ei hun. Cafodd ei babi ei eni’n gynnar, gan olygu bod y ddau wedi gorfod aros yn yr ysbyty am beth amser ar ôl yr enedigaeth. Doedd ganddi ddim rhwydwaith cymorth teulu na chymdeithasol o’i chwmpas, a dyma hefyd oedd ei phrofiad cyntaf o amgylch babanod ifanc. Pan ddaeth y rhiant atom ni, roedd ei gwybodaeth am ddarparu’r pethau sylfaenol, fel newid cewynnau a pharatoi poteli yn gyfyngedig, felly dyna lle ddechreuon ni. O wythnos i wythnos, tyfodd ei hyder a’i gallu i ofalu am ei babi yn annibynnol. Ar ôl bod gyda ni am chwe mis, dychwelodd y rhiant adref gyda’i babi ac mae bellach yn fam anhygoel i fachgen bach.”
Er gwaethaf yr heriau, mae Jo yn parhau i gael ei chymell gan y gwahaniaeth y gall ei wneud:
“Rydym yn deall efallai na fydd hyn bob amser yn digwydd, ond rydym wedi bod yn ffodus bod yr holl rieni sydd wedi symud ymlaen gyda’u plant wedi cadw mewn cysylltiad â ni ac anfon lluniau a diweddariadau rheolaidd. Mae hyn yn gymhelliant enfawr i barhau i faethu ac yn ein hatgoffa o’r gwahaniaeth y gallwch ei wneud i deulu.”
Trwy rannu straeon fel rhai Jo, gallwn ddangos pa mor bwysig yw gofalwyr maeth a’r gwahaniaeth mawr y maent yn ei wneud ym mywydau teuluoedd sydd angen help. Mae maethu rhieni a phlant nid yn unig yn cefnogi rhieni ifanc a’u babanod, ond mae hefyd yn helpu i greu cymuned gryfach i bawb.
Os yw stori Jo wedi eich ysbrydoli, cysylltwch â ni yma i gael sgwrs anffurfiol.
